الثلاثاء، 14 أبريل، 2009

يلا كلنا نحط شرطة (-) في خانة الديانة

أنهاردة اتبسطت ان الداخلية اخيراً قررت انها تنفذ الحكم وتحط شرطة (-) في خانة الديانة للمصريين ذوي الديانة (او العقيدة حسب انتا رأيك ايه!) البهائية.

بما اني من أشد المطالبين بإلغاء خانة الديانة من البطاقة الشخصية لأنه من العار ان توجد مثل هذه الخانة ومصر هي يمكن الدولة الوحيدة في العالم اللي بتعمل كدة! انا عارف ان سوريا ولبنان مثلاً مفيهمش الخانة دي (اتلغت من زمان)، كما ان مصر هي البلد الوحيد في العالم اللي لما تنشر اعلان تطلب تعيين خريجيين جامعة، تجيلك السير الذاتية كلها بلا أستثناء تحتوي ديانة المتقدم للوظيفة ضمن المعلومات الشخصية وكان المعلومة ضمن مسوغات التعيين!!!!

عموماً الفكرة هي اننا كلنا نحاول نطلب من الداخلية وضع شرطة (-) في خانة الديانة على البطاقة الشخصية الخاصة بكل واحد فينا! الحل ده ممكن يكون بديل لإلغاء خانة الديانة لغاية ما يوم من الأيام حد عنده مخ يلغيها...

أيه رأيكم؟؟

هناك 4 تعليقات:

غير معرف يقول...

I love the fact that Religion is added on the IDs in Egypt, and I am proud to be Muslim, and believe that Islam comes before citizenship and other attributes of national identity.

I believe that the Government is caving in to those Baha2i, and that more demands to dilute the Islamic nature of Egypt will come forward in the next few years. What a shame.

A.SAMIR يقول...

يعني سيادتك بترى ان الافضل الغاء خانة الديانة في البطاقة الشخصية؟
و هيكون رأي سعادتك ايه لما تنتشر حالات النصب في الزواج وتلاقي مسيحي بيتزوج مسلمة ومسلم بيتزوج مسيحية وبهائي بيتقدم لخطبة مسلمة وهكذا
ما الدنيا سايبة بقى و محدش عارف ديانة حد

حياة يقول...

افتخر بانى مسلم مصرى واتشرف ان تكون مكتوبة فى الهوية

تحياتى

Nah·det Masr يقول...

عزيزي سمير، هل الناس في دمشق بتنصب في الدين وتروح تتزوج من غير ديانتها؟؟ وبعدين طيب ما انا بطاقتي مكتوب فيها مسلم ولكن ممكن اكون مسيحي او ملحد لأن الدولة تمنع تغيير الدين في البطاقة، وبرضه اقدر اتجوز مسلمة...

ربط الزواج بالدين (بغض النظر عن رأي فيه) يمكن ان يتم بطرق اخرى غير البطاقة زي ما أي دولة في العالم بما فيها الدول العربية بتعمل.. يا أخي أحنا الدولة الوحيدة في العالم اللي الناس بتكتب دينها حتى في سابقة

الخبرة!!! وكأن الدين هو مسوغ للتعيين!!

حياة.. انا لست ضد فخرك بالأسلام لأني انا كمان مسلم، ولكني ضد استخدام الأعلان عن الدين في التمييز بين المصريين.. مطلوب ان يكون الدين علاقة بين الأنسان وربه وليس وسيلة للحصول على المكاسب بين المواطنين اللي المفروض انهم متساويين في الحقوق والواجبات..

وعلى فكرة، زمان كان الدين بيتكتب في الباسبور كمان ولكن ده اتلغي بعد ما كانت فضيحة لمصر...