الخميس، 10 أبريل 2008

واحد مسلم مدخل بنته مدرسة كاثوليكية ورافع قضية علشان يلبسها حجاب!!!

من الحاجات اللي تفور الدم خبر زي ده! واحد مسلم مدخل بنته مدرسة كاثوليكية ليها كود معين في اللبس، يصر ان بنته تلبس حجاب رغم ان المدرسة تمنع ذلك!
يعني مش الأسهل يحول بنته لمدرسة غير كاثوليكية؟ ولا هي المشاكل للمشاكل يعني؟


تخيل واحدة طالبة مسيحية تحاول تدخل مدرسة الطلائع الأسلامية، وبعدين ترفع قضية انها عايزة تلبس صليب في المدرسة! ده إذا اتقبلت اصلاً!

المدرسة تابعة للفاتيكان مباشرة، انا لو من مديرة المدرسة، احول نشاطها الي تدريس الديانة الكاثوليكية وامنع دخول من لايريد دراسة الدين المسيحي مثلاً بالضبط زي المدارس الأسلامية مثل الطلائع

عن المصري اليوم
أزمة طالبات «الفرنسيسكانيات» تتجدد وأولياء أمور جدد يطالبون بحجاب بناتهم كتب هشام شوقي ١٠/٤/٢٠٠٨
شهدت أزمة حجاب طالبات مدرسة «الفرنسيسكانيات» تطورات جديدة، حيث انضم أربعة أولياء أمور إلي ولي أمر الطالبة نشوي محمد جميل، الحاصل علي حكم قضائي بأحقية ابنته في ارتداء الحجاب داخل المدرسة، وتقدموا بشكوي جماعية إلي الدكتور يسري الجمل، وزير التربية والتعليم، ضد المدرسة نفسها.
قال الدكتور رمضان محمد، المحامي الخاص بالطالبة نشوي، إنه في حالة استمرار عدم تنفيذ الحكم القضائي من قبل جهة الإدارة، فإن ولي أمر الطالبة سيقوم برفع جنحة عدم تنفيذ علي الدكتور عبدالعظيم وزير، محافظ القاهرة، والدكتور يسري الجمل، وزير التربية والتعليم.
من جانبه، قال الدكتور رضا أبوسريع، رئيس قطاع التعليم العام لـ «المصري اليوم»، إنه تلقي تأكيداً من مدير مكتب متابعة الوزير بأن الأمر الخاص بتلك المدرسة قد انتهي.
في السياق نفسه، أكد حسن الشيخ، مدير عام مكتب المتابعة التابع للوزير، أن الأمر قد انتهي ولا يوجد مانع من جانب المدرسة لارتداء الطالبات الحجاب.

هناك 6 تعليقات:

Ahmed Shokeir يقول...

وبعد كده نرجع ونقول ليه المسيحيين بيشعروا بإحتقان داخلى واحساس بالإضطهاد
بالطبع الموقف مستفز والدعوة مستفزة وحكم القضاء بالرغم من نزاهته مستفز
وكأن المقصود هو إستفزاز مشاعر المسيحيين
فبالرغم من ان الحكم القضائي يحمل في طياته الحرية الشخصية وعدم إجبار المواطن على خلع او لبس الحجاب إلا أن يعمل على زيادة حالة الإحتقان والعيب ليس في القاضي ولكن في القانون وهناك من إستغله بطريقة سيئة جعلت إدارة المدرسة ترضخ لذلك ولكن ليس بطيب نفس ورضا

Nah·det Masr يقول...

بالضبط يا أبوحميد، حاجة تجنن فعلاً؛ انا لو مسيحي يمكن يجيلي ضغط من خبر زي ده!

وجهة نظري يقول...

زماااان كان إخواتي البنات في مدرسة النوتردام في الزيتون، ومكنش في حد بيسمع عن دي مسيحية ودي مسلمة ودي لابسة حجاب ودي بتضايق المسيحيين، وكانت السير عاملة رعب للبنات وكلهم مسلمين ومسيحيين بيحبوها وبيحترموها، وكنا بنقول أحسن تربية هيا تربية مدارس الراهبات، مكانش في أي مشاكل دينية ولا مشاكل لبس، المهم البنت مسلمة ومسيحية تبقي محتشمة، الجيب تحت الركبة بكتير، القميص مقفول لحد الأخر مفيش زينة والشعر ملموم..... تربية

إنما إية الي حصل دلوقتي وقلب المواضيع وكبرها وبقي في فروق بين مسيحيين ومسلمين ومحجبات ومش عايزين يتحجبوا؟ هما لو مش متقبلين تلاميذ مسلمين عايزين يتحجبوا، ما يرفضوا المسلمين من الأول ويبقي دا نظامهم الأساسي "مدرسة مسيحية للمسيحيين فقط"، إنما يقبلوا مسلمين وعايزين يفرضوا نظامهم في بلد للجميع، أعتقد ميصحش ولا قانونيا ولا أخلاقيا

دا رأيي

Nah·det Masr يقول...

يا عزيزي وجهة نظر، من امتا كانت البنات في خامسة ابتدائي بتتحجب اساساً؟؟؟ انا شفت حتى بنات عمرهم 5 سنين محجبات في مدارس الحكومة. الفرنسيسكان لها دريس كود خاص بيها، اللي مش عاجبه ميدخلش المدرسة بسيطة يعني، وبعدين بصراحة، انا لو من السير نادية مديرة المدرسة، انا كنت اجبرت اولياء الأمور على التوقيع على التزام بناتهم بالزي المدرسي عند التسجيل! كل الناس عارفة ان المدارس دي فيها احسن تربية في مصر وبعدين المدرسة بنات بس!!!!! هيتحجبوا على مين؟؟؟؟
وبعدين المدارس الأسلامية بترفض المسيحيين اساساً؟
يا جماعة خليكوا منطقيين!!

bluestone يقول...

على فكرة انا تربية مدارس راهبات
وكان عندنا دريس كود معروف ..
في البداية كانت الراهبات اصلا معندهاش علم ان فيه حاجة اسمها حجاب للبنات الصغيرين كان ممنوع لحد اعدادي

وافتكر اول بنت اتحجبت وجت المدرسة رفضوا يدخلوها الفصل والسير زعلت جدا عليها وحولتها للدكتورة .. كانت فاكراها مصابة بمرض في ودانها ومغطياها عشان كده :)
وقعدت تسألها انتي مغطية ودانك ليه؟ انتي عيانة ؟ وطبعا فهموا متأخر ان ده حجاب

في النهاية هو كان ممنوع في المدرسة لحد تالتة اعدادي تقريبا

الفكرة في انه ازاي بنات في خامسة ابتدائي يبقوا محجبات ؟؟ يعني لا اعتقد ان ده اختيار شخصي ؟ مفيش طفلة هتفهم ان الحجاب فرض ولا عفة ولا تدين ولا التزام ؟؟ دي طفلة يا جماعة .. عيلة مفيش فرق بينها وبين الطفل الولد اللي في سنها ... ومش قادرة افهم سبب لده

مين المريض اللي ممكن يشوف في طفلة في خامسة ابتدائي اغراء او فتنة؟؟
ومين المجنون اللي ممكن يعتقد انه بحجابه لطفلة في السن ده بيحميها من الفتنة ؟؟

Nah·det Masr يقول...

شكراً يا بلو ستون على التعليق، طبعاً انا متفق معاكي في كل اللي قولتيه، بس انتي زودتي الخبرة الشخصية بتاعتك. للأسف مصر اللي عرفناها واحنا صغيرين بتتغير تماماً عن ما عرفناها.
احنا ايامنا مكنش ممكن حد يفكر في حاجة اسمها حجاب سواءاً في مدراس حكومة او مدارس راهبات (انا كمان خريج مدرسة مشابهة).