الأربعاء، 2 أبريل 2008

مصطفى بكري عايز يأمم ثروات الأغنياء






امبارح مصطفى بكري كان بيقول في برنامج نأسف للأزعاج على قناة دريم 2 ان فيه عشرة افراد في مصر يملكون 300 مليار دولار، المفروض نأخد منهم 200 مليار، ونسيبلهم 100 مليار!!


انا معرفش مين العشرة افراد اللي بيتكلم عليهم بكري، ولكن اشهر وأغنى أغنياء مصر هي عائلة ساويرس اللي أتأممت مرتين ومع كده انسي ساويرس قدر يبني امبراطوريته من تاني ومعظمها من مقاولات واعمال تجارية خارج مصر لغاية ما بقى حجم اعمال العائلة 35 مليار. على حد علمي، ثروة عائلة ساويرس كلها من مصادر مشروعة ومعظمها من خارج مصر. السيد مصطفى بكري شايف ان احنا المفروض نستولى (ننهب يعني) ثلثين ثروة هذه العائلة الشريفة اللي فاتحة بيوت عشرات الألاف في مصر ونديها للفقراء اللي قاعدين على القهاوي مش عايزين يشتغلوا.

انا هدي مثال بسيط! انا عندي فتاة تعمل في المنزل عمرها 19 سنة ومعاها دبلوم بتأخد 800 جنيه في الشهر. لما مشيت علشان جوزها مش عايزها تشتغل، معرفتش اجيب غيرها!!! وعندي سواق يوصل اولادي للمدرسة ومراتي للشغل بياخد برده 800 جنيه في الشهر طلعت روحي لغاية ما لقيته ونزلت اعلانات كتير علشان اعرف الاقيه!

لما الأعمال البسيطة زي دي واللي انا شايف ان مرتباتها معقولة ومش لاقي حد يشتغلها، معناها انه اما ان مفيش بطالة؟! او ان الناس بتتأفف تشتغل الشغلانات دي!!

بلاش كده! واحد صحبي عنده مزرعة على الصحراوي، بتطلع روحه علشان يجيب انفار بـ 20 جنيه في اليوم وبيشتغلوا لغاية الساعة 3 مع لنش بريك في النص!

انا نفسي افهم ازاي في ناس في مصر عندها صحة وقاعدة مش لاقية شغل! أكيد طبعاً في نسبة مستنية تشتغل في بنوك استثمارية او شركات بترول ولكن المفروض ان الشاب في بداية حياته يندعك زي ما كلنا اندعكنا وكنا بنطبق ايام ورا بعض من غير نوم قاعدين نشتغل 40 و50 ساعة متواصلة.



أخيراً، نفسي افهم سر قوة مصطفى بكري لدرجة انه يلتف على تنفيذ حكم، ويخصه الرئيس مبارك بحديث برغم اسلوبه الذي يشبه الي حد كبير اسلوب جريدة الأهالي في تسويد كل شيء واتهام الناس بدون ادلة.







هناك 7 تعليقات:

Nah·det Masr يقول...

I removed the above comment because it contained a link to a virus/malware site if you click on the link

A.SAMIR يقول...

وسيادتك مستغرب ليه؟
هو دة الفكر الناصري اللي خرب مصر
وافرغ مصر من الاستثمارات سواء اكانت مصرية او اجنبية
العجيب بقى
انك لو دورت ورا اولاد واحفاد افراد انقلاب 1952 هتلاقيهم اغلبهم عايشين عيشة الملوك رغم ان معظمهم كان معدم
هو دة مصطفى بكري وهو دة الفكر الاشتراكي العقيم
تحياتي واحتراماتي

Nah·det Masr يقول...

شكراً على تعليقك يا عزيزي. الناس دي فكرة انها لما تعمل ثورة وتسرق فلوس الناس الأغنياء زي ما حصل في الستينات والحالة هتتصلح. هما واهمين ولو حصل ده هيدمروا البلد زي ما حصل قبل كده.

ebnmasr يقول...

المشكلة لا فى الفكر الناصرى ولا الساداتى ولا المباركى المشكلة فى النظام وما تستعجبشى
على راى نزار
فى هذى البلاد يهدى المثقفون صوتهم
لسيد المثقفين عنترة
يجملون قبحه..وينشرون فكره..يؤرخون عصره
يقرعون طبوله عى حروبه المدبرة
يا سيدى كلهم صنيعة النظام
وعلى الفكرة السرقة موجودة منذ الملك والثورة وبعد العبور وحتى يومنا هذا
وهذا هو الداء
تحياتى وادعوك لزيارة مدونتى
تحياتى

Nah·det Masr يقول...

عزيزي ابن مصر، شكراً على التعليق وهأزور مدونتك طبعاً. انا مش متفق معاك ان امثال البكري هم من صنيعة النظام، المتسلقين موجودين في كل زمان ومكان وملهومش دعوة بالنظام غير انهم بيحاولوا يستفيدوا منه

غير معرف يقول...

الذين يتحدثون عن الأستاذ مصطفى بكرى بهذا الشكل هم جهلة يملأ الحقد قلوبهم ويتحركون كاجراء فى ساحة الفساد والفاسدين هؤلاء الذين هاجمهم مصطفى بكرى وكشف فسادهم ووقف مدافعا عن ابناء الشعب المصرى ونحن من ابناء هذا الشعب نتابع حقيقة دور هذا المناضل الوطنى الذى وقف فى احداث 18 و19 يناير من العام 1977 مدافعا عن الفقراء والمقهورين وتم سجنه وهو لايزال طالبا لقيادته المظاهرات الرافضة لرفع الاسعار فى هذا الوقت وفى العام 1980 كان صوت مصطفى بكرى هو الوحيد فى مواجهة افتتاح السفارة الاسرائلية فى مصر حين قاد مظاهرة ضمت خمسمائة من الشباب الوطنى جابت شوارع مدينة قنا تندد بتدنيس ارض مصر ورفع علم الصهاينة فى سمائها وكانت المرة الثانية التى يسجن فيها فى سجن قنا العمومى.. ومنذ التحق بالصحافة بعد خروجه من السجن اثر اعتقاله بعد مصرع الرئيس الراحل انور السادات كرس بكرى جل حياته فى محاربة الفاسدينزز من ماهر الجندى الى طلعت حماد الى نجيب ساويرس ويوسف والى واحمد عز وابراهيم نافع وغيرهم العشرات الذين تسبب فى اسقاط بعضهم من كراسيهم وسجن البعض الاخر وملاحقة من تسببوا فى كوارث للمصريين وعلى راسهم ممدوح اسماعيل صاحب عبارة الموت.
وتشهد مضابط مجلس الشعب بالدور الوطنى الذى لعبه بكرى تحت قبة البرلمان منذ اختارته جماهير حلوان نائبا عنها فى تحد غير مسبوق لمرشحى الحزب الحاكم.
تاريخ مصطفى بكرى الوضاء اكبر من محاولات المساس به عبر العملاء والمأجورين الذين لا يملكون سوى شن الحروب بالوكالة والإساءة بالأكاذيب والتعرض للمحرمات مما يؤكد انهم من الساقطين الذين لا يعرفون معنى للقيم ولا الأخلاق.
مصطفى بكرى أكبر من أن تطاله تلك الأذناب الرخيصة والأقنعة الزائفة التى ترتزق من الحرام لتخوض فى المحرمات.

mohamed abdallah يقول...

السلام عليكم باختصار انا حياتى مهددة بسبب الصورة اللى حضرتك واضعها فى المدونه عندك بدايه القصه انا من قريه المعنا التابعه لمحافظه قنا ومصطفى بكرى من نفسى القريه التى انا منها فكنت سمعه انه مرشح لرئاسه الجمهوريه وانا ضد ذلك فعملت حمله وطلبت من الناس المشاركه لرفض بكرى ووضعت صورة بكرى التى اخذتها منكم ففوجئه بان اهل بكرى فى قريتنا يهددونى قالو لى احنا ميهمناش النقض بس الصورة دى مفبركه ولازم نأدبك على انك وضعت صورة زى دى للاستاذ لمصطفى بكرى ولانى انا خارج مصر قلتلهم انا قدامى سنتين ان شاء الله وارجع قالولى ان شاء الله 10 سنين مش هنسيبك ولازم تتادب ومع انى اكدة لهم انى الصورة مش مفبركه بس هما مش مقتنعيين ارجوك يا اخى قل لى مصدر الصورة ايه اى برنامج او اى فديو اخذة انت منه صورة بكرى هذة فعائله صيام التى يتبع لها بكرى تستخدم نفوزها لارهابنا قل لى بالله عليك ما مصدر الصورة هذة واجدها فى اى برنامج حتى اثبت لهم ان الصورة حقيقيه ولو كانت مفبركه فانت اذيتنى والله يسمحك
ادعوك الى زيارة صفحتى على الفيس بوك ولكن موضوع بكرى حذفته لان تهديداتهم صريحه وقويه هذا هو عنوانى على الفيس بوك http://www.facebook.com/profile.php?id=100001203604382
ساعدنى ارجوك